Foto: Grethe Nygaard
I kveld blei Haugesund kommunes heiderspris Den spelande faun utdelt på ordførarens middag under Den norske filmfestivalen. Mottakaren er kinoleiar ved Friberg Kino i Balestrand, Marianne Hoff.
Den spelande Faun er ein miniatyr av skulpturen som møter publikum på veg inn i byens konserthus – Festiviteten. Skulpturen er laga av bilethoggar Fritz Røed i den italienske landsbyen Villa Faraldi.
Mottakaren av byens Faun skal ha gjort ein innsats til å fremje norsk film- og kinoliv. Dessutan skal prismottakaren ha hatt eit godt auge til Haugesund og besøkt filmfestivalen titt og ofte. Stort nærmare eit æresborgarskap i Haugesund kjem ein neppe.
Den spelande Faun har sidan 1988 vore tildelt følgjande venner av Haugesund:
Arne Hestenes, Bente Erichsen, Elsa Brita Marcussen, Pål Bang-Hansen, Eva Isaksen, Egil B. Fonn, Liv Ullmann, Åse Kleveland, Sigurd Moe Hetland, Vigdis Lian, Knut Bohwim, Gunnar Johan Løvvik, Sigve Endresen, Bjørn Hoenvoll, Jan Erik Holst, Martin Nordvik, Per Haddal, Jørn Rossing Jensen, Herborg Kråkevik, Stine Oppegaard, Kalle Løchen, Lene Løken, Lars Roar Langslet, Liv Jacobsen, Håkon Skogrand, Frida Ohrvik, Derek Malcolm, Brian Cox, Richard Hobert, Bille August, Lena Endre, Guttorm Pettersen, Anja Breien, Christin Berg og Birger Vestmo.
Dette sa ordførar Nils Konrad Bua i talen sin:
Velkommen til Filmbyen, Haugesund rådhus og ordføraren sin middag.
Eg må få starte med å takke fylkesordføraren for den fine talen, engasjementet og tilstadeværet på Den norske internasjonale filmfestivalen. Byen sette stor pris på ditt og fylkeskommunen sitt bidrag.
Så må eg få takke alle for ein flott start på årets festival, med eit stjernespekka og underhaldande Amanda-show på laurdag, ein fantastisk opningsdag i går – og ikkje minst som tok oss inn i eit univers vi sjeldan kjem til på norske kinoar.
Nå er me komne fram til eit av høgdepunkta under ordføraren sin middag – utdelinga av Den spelande Faun.
Den spelande Faun er ein miniatyr av skulpturen som møter publikum på veg inn i byens konserthus. Skulpturen er laga av bilethoggaren Fritz Røed i atelieret hans i den italienske mellomalderbyen Villa Faraldi.
Mottakaren av «Den spelande Faun» skal ha gjort ein innsats for norsk film- og kinoliv.
Prisen blir delt ut av ordføraren i festivalbyen til ein som har hatt eit godt auge til Haugesund og besøkt Den norske filmfestivalen titt og ofte. Stort nærare eit æresborgarskap i Haugesund kjem ein neppe.
Den aller første som fekk «Den spelande Faun», var Dagbladet-journalisten Arne Hestenes. Sidan har statuetten blitt delt ut til nærmare 40 mottakarar, dei fleste frå norsk film- og mediebransje, men òg til personar frå andre europeiske land.
Årets vinnar av Den spelande Faun har i meir enn fire tiår vore ei drivkraft i kulturlivet i ei bygd på Vestlandet. Som kinosjef og leiar av den lokale kinoen, som blir driven av eit ungdomslag, har ho gjennom arbeidet sitt sørgt for eit godt filmtilbod til publikum i alle aldrar. Under leiinga hennar har kinoen utvikla seg til ein levande kulturell møtestad og ein viktig hjørnestein i lokalsamfunnet.
Som aktiv i ulike styre innanfor kinobransjen har ho vore ein engasjert talsperson for vilkåra til norske kinoar, særleg har ho vore oppteken av dei minste kinoane, og av kinoane som blir drivne på dugnad av frivillige.
Ho har halde fram med engasjementet sitt etter at ho gjekk av med pensjon, og bidraga og innsatsen hennar har vore verdsette med fleire prisar, både lokalt, nasjonalt og internasjonalt. Vinnaren er eit førebilete når det gjeld langsiktig engasjement, samfunnsdeltaking og ei urokkjeleg tru på kinoen si rolle som eit kulturelt og sosialt samlingspunkt.
Årets vinnar har vore ein fast gjest på Den norske filmfestivalen i Haugesund sidan midten av 1980-talet, og har til og med kalla ei av døtrene sine Amanda.
Den spelande Faun går i år til ein sann fremjar av kinokulturen, kinosjef Marianne Hoff ved Friberg Kino i Balestrand.
Det er ei glede for meg som ordførar i festivalbyen å tildele deg Haugesund bys Den spelande Faun.
about us
get in touch
